Page 1 of 1

PASKE

Posted: Wed Nov 01, 2006 11:35 pm
by Guest
PASKE (Ti Gus)

Paske ou wè'm pap krye, ou panse'm pap soufri
Paske ou wè'm pap plenyen, ou panse'm pa konprann
Paske ou wè'm pap rele, ou panse'm se mouton
Paske ou wè'm ap danse, ou panse mwen kontan

Paske ou wè'm abiye, ou konprann afè'm bon
Paske ou wè'm ak krizokal, ou konprann se lò
Paske ou wè yon bout kay, ou konprann se palè
Paske ou wè'm milat, ou konprann m'se boujwa

Paske ou wè'm nèg, ou joure'm nigger !
Paske ou wè'm an kolè, ou rele'm chimè !
Paske ou wè'm pòv, ou rele'm “moun sa yo” !
Paske ou kandida, ou rele'm “ frè'm / sè'm ” !

Paske ou wè'm ap chante, ou panse'm pa grangou
Paske ou wè'm pa mande, ou panse'm pa bezwen
Paske ou wè'm pa joure, ou panse'm pa fache
Paske ou wè'm inosan, ou konprann pou'w pile'm

Enben…
Mwen se Boustabak ki konn bat malfini !
Mwen se Manchini, al mande Macandal !
Mwen se pwazon goumba, al mande “Aux-Enfers”
Si ou konprann mwen manti, kontinye anmède'm !